Выданне пабудавана на фактычным матэрыяле з прыцягненнем дакументаў і фотаздымкаў. Старонкі кнігі здзіўляюць глыбінёй даследвання жыцця вёскі, а часам выклікаюць настальгічны сум па далёкіх часах дзяцінства, якое цесна было звязана з вёскай. У чарговы раз аўтары пакараюць глыбінёй свайго розуму і чысцінёй памкненняў. Кранае іх любасць да мастацкага слова, нацыянальнай даўніны і гісторыі. Лішні раз пераконваешся ў тым, які добры вынік дае гарманічнае спалучэнне творчай задачы і літаратурнага таленту.

Чалавек апантаны (у самым станоўчым сэнсе слова), айцец Рыгор захапляе сваім запалам не толькі людзей шаноўнага ўзросту, але і студэнцкую моладзь.

Спадар Дарафей Фёнік дапоўняе галоўнага аўтара. Склалася ўражанне, што гэты творчы тандэм яшчэ доўга будзе радаваць нас сваімі здабыткамі. Абодва – гарачыя прыхільнікі беларускіх традыцый, патрыёты сваёй Айчыны, захавальнікі духоўных скарбаў даўніны і проста неабыякавыя да ўсяго людзі. Абодвух вылучаюць бескарыслівасць, даверлівасць, пачуццё гонару за свой народ і гарачая любоў да чалавека працы. (Н.Г.)