У пачатку сьнежня 2005 году, калі мы разам зь Сержуком Горбікам, працавалі над кнігай “Беларускі Супраціў”, прыйшла ашаламляльная вестка: Міхал Вітушка жывы. Перад гэтым я запытаўся ў былога партызана, ці вядомая яму дакладная дата сьмерці М. Вітушкі? У адказе ён напісаў: “Аб Вітушку я некалькі дзён таму даведаўся, што ён вельмі хворы, але жывы”...

Ня верылася. Але праўдзівасьць інфармацыі пацьвердзілі некалькі былых удзельнікаў паваеннага беларускага партызанскага руху, якія жывуць на Захадзе.

Мы сьпяшаліся, кніга пісалася хутка. Камбатанты дапамагалі, адказваючы на нашыя шматлікія пытаньні. У пачатку лютага 2006-га былы камандзір партызанскага атрада “Белавежа” ў сваім лісьце напісаў: “Маю вестку, што Вітушка вельмі хворы і стан яго вельмі дрэнны”. (С. Ёрш, Стагодзьдзе Вітушкі, фрагмэнт)