Галоўны рэдактар беларускай недзяржаўнай газеты "Новы час" Аляксей Кароль стаў пераможцам Міжнароднага конкурсу журналістаў імя Найта за 2008 год. Прэмію Міжнароднага цэнтра журналістаў (ICFJ) таксама атрымаў журналіст з Уганды Фрэнк Ньякаіру.

"Апошнія 15 гадоў Аляксей Кароль падаваў суайчыннікам незалежную інфармацыю, нягледзячы на фізічныя нападкі і моцны ціск з боку дзяржавы, — гаворыцца ў паведамленні ICFJ. — Першая яго газета "Згода" была закрыта рашэннем Вярхоўнага суда Беларусі ў 2006 годзе. У 2007 годзе ён пачаў выдаваць штотыднёвую газету "Новы час", якой таксама даводзіцца нялёгка".

Імёны пераможцаў былі аб'яўлены падчас 61-га Сусветнага газетнага кангрэса 3 чэрвеня ў Гётэборгу (Швецыя). Як зазначыў на цырымоніі старшыня ICFJ Джойс Барнатан, А.Кароль "сімвалізуе апошнюю надзею на свабоду прэсы ў Беларусі".

Уручэнне ўзнагарод адбудзецца 12 лістапада ў Вашынгтоне (ЗША) у прысутнасці 500 прадстаўнікоў СМІ.

Сёлета Міжнародны конкурс журналістаў імя Найта праводзіўся ў дзесяты раз. Яго пераможцамі становяцца журналісты, якія "выказалі выключную вернасць прафесіі і, нягледзячы на вялікія выпрабаванні, захавалі высокія стандарты журналістыкі". Прыз складае тысячу долараў ЗША.

Крыніца: Марына Рахлей, БелаПАН.

Камунікат.org сардэчна віншуе галоўнага рэдактара беларускай недзяржаўнай газеты "Новы час" Аляксея Кароля зь перамогай у Міжнародным конкурсе журналістаў імя Найта за 2008 год!!!

Газету "Новы час" можна знайсьці на нашым сайце тут