У апошнюю нядзелю ў Менску ў Літаратурным музэі Янкі Купалы адбыўся Першы Купалаўскі слэм. Слэм – гэта спаборніцтва паэтаў, калі кожнаму ўдзельніку даецца роўна тры хвіліны, каб максымальна эфэктна прачытаць свае вершы. Традыцыйна слэм судзяць самі гледачы. Але ў акадэмічным Купалаўскім музэі было й прафэсійнае журы – літаратары Пятро Васючэнка, Віктар Шніп, Людміла Рублеўская, музыка Алесь Камоцкі. Вядоўцам слэму быў паэт, старшыня Беларускага ПЭН-цэнтру Андрэй Хадановіч.

Андрэй Хадановіч: Мне здаецца, што пра пэўныя эстэтычныя перамены гаворыць такое месца, дзе адбываецца слэм. Не ў піўным падвале, не ў начным клюбе, а ў шаноўным, дзяржаўным Купалаўскім музэі, які хоча быць ня толькі акадэмічным, але й больш адкрытым, актуальным, маладым.

Першы Купалаўскі слэм, Менск 5.04.2009
[1]	[2]	[3]
Першая   ««   [1] [2] [3]   »»   Апошняя
Фота © 2009 Сьвятлана Багданава

[1] Пераможца Першага Купалаўскага слэму паэт Віктар Жыбуль, [2] Вядоўца слэму паэт Андрэй Хадановіч ласкава выконваў ролю мікрафоннай стойкі, [3] Выступае паэтка-скандал Вера Бурлак, [4] Паэт Уладзь Лянкевіч, [5] Паэтка Валярына Кустава, [6] Мадэратарка слэму Марыйка Мартысевіч выконвала ролю Лідзіі Ярмошынай – лічыла галасы, [7] Паміж паэтамі выступаў гурт “Босае сонца”, [8] Заля не да ўсіх выступоўцаў ставілася спагадліва…, [9, 10] Як, зрэшты, і прафэсійнае журы

Спадар Хадановіч коратка азнаёміў 18 удзельнікаў з правіламі. Адзначыў, што пасьля першага чытаньня будзе паўфінал, а затым – фінал. Даў таксама некалькі падказак.

Андрэй Хадановіч: Слэм – самае дэмакратычнае відовішча. Але гэта абсурд, гэта тое, чаго ня можа быць – бо ня можа быць спаборніцтва ў паэзіі. Зразумела, што кожны паэт тут па азначэньні пераможа. Але пры гэтым будуць яшчэ й адзнакі. Адзнакі за тое, якія харошыя вершы, і адзнакі за тое, як хораша, як артыстычна, як эфэктна, дрыгаючы рукамі й нагамі, мадэлюючы голас, сэксуальна прышэптваючы ці анархічна падвышаючы голас – хто на што здатны – будзе гэта ўсё адбывацца.

На сцэну выйшла паэтка Вера Бурлак. І пачалося.

Вера Бурлак:

Мама – вінегрэтарэз,
Тата – вінегрэтаразьмес,
Бабуля – вінегрэтасол,
Дзядуля – стаўшчык вінегрэта на стол.
Які цудоўны атрымаўся вінегрэт!
А я – вінегрэтаед!

Паэты стаялі, сядзелі й ляжалі, крычэлі й шапталі, апраналіся й распраналіся, скакалі й бегалі, ругаліся матам. Што, дарэчы, бянтэжыла прафэсійнае журы й весяліла гледачоў у залі.

Пераможцам слэму стаў паэт Віктар Жыбуль.

Віктар Жыбуль:

Мы глядзім порна! Увесь экран чорны!
І па гарызанталі, і па вэртыкалі:
Дзеяньне адбываецца ўначы ў Сэнэгале!
Мы глядзім порна!
Скрынка гудзеньня поўная!
Ратуйце, добрыя людцы:
Дзеяньне адбываецца ў трансфарматарнай будцы!
Мы глядзім сэрыял
Пра начны Сэнэгал!
І па гарызанталі, і па вертыкалі,
І куды вы штэпсэлі паўтыркалі?!
На экране палоскі,
Клічнікі, кропкі, коскі,
А ў мяне пытальнік:
Хто мне пазычыць паяльнік?
Усё жыцьцё – порна!
Трансфарматарны марш грайце, горны!
Распачынайце фэст-карнавал!
Усё жыцьцё - -Сэнэгал!
Усё жыцьцё – самавар!
Усё жыцьцё – сенавал!
Усё жыцьцё - -самазвал!
Я паўтараю паўторна:
Наша жыцьцё – гэта порна!

Па сканчэньні слэму дырэктарка Купалаўскага музэю Алена Мацевасян падзялілася зь Беларускай службай Польскага радыё сваімі ўражаньнямі.

Алена Мацевасян: Хачу сказаць, што апошнім часам Купалаўскі музэй сваю палітыку будуе менавіта на моладзевую аўдыторыю. У нас ёсьць арт-праект “Музэюм”, разьлічаны менавіта на студэнтаў і моладзь. І вось Першы Купалаўскі слэм – гэта менавіта ў межах гэтага арт-праекта. Мне здаецца, што слэм быў удалы, вельмі высокі ўзровень паэтаў, і наш музэй застаўся задаволены гэтым слэмам. Мы мяркуем у наступным годзе яго працягнуць і зрабіць яго традыцыйным.